Kamp
Vurriegs joar hant ze ziech noa vöal joare nog ins jetróffe. D’r Wiel en ziene sjoeëlkammeraad. Óch inne Wiel. ’t Hat hön jód jevalle. Dis joar zient ze ziech werm. Ze wille nog ins tseruk joa noa de plaatsj van ’t sjoeëlkamp. Zoeng sjun erinneroeng hant ze doa aa. Óp d’r fiets junt ze. D’r lange waeg noa ’t dörp. Va wieds zient ze d’r kirchtoere. Ze zinge ee va de kamplidjer. An inne veldwaeg likt d’r boerehof. Mit obsbeum en inne sjpieëljaad in ing wei. Woa de tente sjtónge.
Wie kótterbij ze kome, wie sjtiller ze weëde.’t Kamplidje sjurft voet i sjwieje. D’r boerehof is kóm tse zieë. Meters hoeëje sjtruuch. Ónkroed hat de uvverhank. Ritse i moere. Vinstere mit inkele jlaassjplietere. Verf jebladderd. Duur vermolmd haof óp. Ze sjtieje nit aaf. Ing tsiet sjtunt ze neëveree. Sjwiejend. Inne droom versjrómpeld. Ónbejrif.
Ze fietse wieër. Durch de busje woa ze sjpeller hant jesjpieëld. Die erinneroeng jieët de vräud va doe tseruk. De natoer umermt hön. Wie ’t leëve óch kan endere, dat bliet. Ze zinge werm e kamplidje. Zoeë vare ze noa heem. ’t Dörp in d’r ruk weëd klinger. D’r boerehof waast wieër tsouw. ’t Sjoeëlkamp jeveul vieët mit ze mit. Umermt hön. Wie de natoer.
