Jöarieg

‘Jeboertsdaag, tsezame mit ’t vrugjoar. E ieëwieg jónkjeveul.’ Dat hauwe de kinger óp ing jroeëse kaat jesjraeve. Jetseechend durch de klingkinger. Inne daag mit zinge va ‘Lang leëve’, kóch aese, keëtse oesbloaze.
Óp d’r dusj likt e jroeës sjtuk papier. Tseechene mit d’r opa. D’r Wiel hat dróp jesjraeve: ‘inne sjunne daag’. D’r inne moalt ing zon. D’r angere miepmöp. Ze vleie noa blomme. Kinger sjpringe köadje. Bel vleie durch de loeët.
E koenswerk durch kinger. D’r sjunne daag sjtroalt óp d’r dusj. Mit plekkauwjoem hingt d’r Wiel ’t teëje ing kasduur. Noen neëme de kinger ’t Bertie en d’r Wiel mit noa an duur. E jesjenk oeszukke. Ing vräud vuur d’r opa. Dat is flot passeerd. Leëze en moeziek. E jans leëve vuur d’r Wiel en ’t Bertie. Doa is ummer jet i tse vinge.
Óp d’r tserukwaeg inne kingerwónsj. E ies aese. Zoeë ainfach sjun kan inne daag zieë. Mit inne pannekóch an d’r sjloes. Zingend noa heem. E lid klinkt, ‘Inne sjunne daag’.
’t Oavends bekieke ’t Bertie en d’r Wiel ziech de tseechnoeng an de kas.
Ing janse koens. Noa werm e joar. De daag rije ziech anee. Um ziech riech tse veule. Tse dele.