2011 nov III
(laat u voorlezen!)
't Lifste zouw heë e bóch leëze. In d'r sjtool bij de vinster. Uvver sjpoeëke, hekse en jeeste. En doabij 't an duur sjtórmt. De bleer durch de loeët vleie. D'r wink um 't hoes fleut. 't Hoots in d'r kachel brent. Joa, dat is 't herfs-jeveul van d'r Dris. Mar noen sjiengt de zon. 't Is zoeëjaar werm.
't Mörjens sjteet d'r Dris jeer vrug óp. Ziet de zon ópkome. Ze bejrust d'r daag. 't Is nog sjtil. De welt sjlieft. 't Is jraad of de zon vuur hem alling sjiengt. Wie angesj is de oavendzon. Ing welt vol hantier. De zon nimt absjied. Absjied van alle lu.
D'r Dris veult ziech heem in de natoer. De ónendlieje natoer. Die jebore lieët weëde en deed sjterve. Die alles en jidderinne umermt. Die nuuks bedinkt. Is zoeëwie ze is. Ing troeës.
D'r Dris zitst in d'r sjtool bij de vinster. 't Sjpoeëke-bóch sjteet nog in de kas. E sjtuk papier likt óp d'r sjoeës. Heë sjrieft e lidje. Uvver de natoer wie dan óch, ummer werm. E lidje bij alle weer. Mit wöad va troeës.
In d'r winkter is 't veëdieg. Boave in d'r krisboom zal 't hange. Jevauwe mit engele-vluejele.
